Zotung ccung ccaw kong

E-mail ပံုႏိွပ္ပါ
ပရိသတ္ ၏ ေပးမဲ: / 4
မေကာင္းဘူးအေကာင္းဆံုး 

Raw thawng oh sih!


Be strong



Nungpaaw hae she lyaze ccungccaw miakaw  nynh sawtuanaw ah pya haepaw  tuh poi  tua kho zah, a chia a lo kho paw: Innku, voklaw chia, boipi, Longtuk-longsaw, khuaccoi,  cihawte  cciaccaaw chia pyakunaw kya sahhiin pataepi theh kho paw hynh  sawtua-rawrinaw kha ccou hae zah, ccungccaw  balyng nynh a phute sah haepaw nynh thua.

 


Te sawkaw kho haepaw nynh sahang: Ngeihi , vomkhoi, kaepi- kaesing akaw kho hae ze, a kaw haepaw kaepi- kaesing due te poipi tua khopaw thuasah, vomkhoi, ngeihi due te poi tua khonaw thuasah, tuh-e tuh leesaenaw te minthangnaw lang a riaku hae. Tukeiccu tuh poi pataepi tua kho nawlan te saw kaw kho ze, dueku poi  patae tua kho nawlan loo pho khonaw zuaku hae zah, looh patae a vui sah hae.


Tuhcihawte kum te she nynh oun rulaeku zah, atu, ccaaw she nopaw she vae tuh, ccung ccaw miakaw nynh sawtua- phu-enaw ah pya haepaw tuh, degree lah zah thyahawnaw a hoi haepaw, mawtawka are kho haepaw, internet a thung kho haepaw mihra ccaw thya te computer a hoi haepaw hynh phu-e sawtuanaw oun ccou vae hae. Ccungccaw hae nynh oun dothung vae hae.

Langmaw nungpaaw  she lyaze, min thangpaw thua kho nawlang te poi pataepi tua kho nawlang tuh loo pho kho te looh pataepi vui sah a ho hawte, atu she vae tuh, phua-sui ccung kho zah, phua patae a mawe khopaw rouh nynh mih ccaaw hae sianginn mah kae sah kho hae zah, mih sipuaizi ahoypaw tuh mawtawka cia a re kho hae.

Nungpaaw she lyaze loo pho hua leipaw ccungccaw tuh pawcite a lunghaw zah, a thinlung hoypaw a thua zemah nungpaaw hae nynh phute sah haepaw poi a tua kho bua khyh keiccuze  ccungccaw hae nynh pawlang ria khyh hae zah, chui balei-nawbalei lang,  poi tua khopaw um ze, thohae lang  a honaw thyhte ryalaw kha a chui hae.

Tuhcihawte atu zemah ryalaw a hua leipaw a thawnawpaw ( Vaelua a hua leipaw) athua khyhze, zu-ae te niapaw kyalya a mangthyapaw hanlan tuh,  pawcite a lunghawpaw te a thinlung hoypaw a thua zemah, ccungccaw miakaw nynh pawlang ria khyh hae. Pawccecize a zu- a aepaw nynh amaw hanlan sangkaw thahnenaw pya kho khyh. Phua-sui a tha a pia ze,  a pynsaw balyng a ro. Zu te niapaw tuh mihmaw pepa ccungccaw hae kha a ro a piaze minphuin te ram balyng ro kho zah, the thyanaw mah oun ccou  sah.


Ccungccaw a hiinnaw hynh do lan a  thua ze laevaw hinnzung  ah ryakunaw hynh myarya a ccihpaw nynh thua. Amaw hanlan kyalya ah ryakupaw thua khyh.  Pachia pyapaw zu-ccaaw hae te innbyng te uno- vaeccaw hanlan, minphuin te khuaram hanlan ryalaw te ah hinnpaw ccungccaw nynh thua.

Hiinzung laephi kya hynh lukheit kyalya te ramkaw khe nui te lungpaw lungtuanaw a um khopaw thua khyh. A ngaethyanaw zemah ccungccaw hae malang khe  a ngaethyanaw kha a phute lang a langsahku ry. Ccungccaw a hiinnaw kyaze lungtua ze thuasah, ngaethya ze thuasah, ccungccaw hae ryte pyngkheih lang lungtua kheih te ngaethya kheih paw hynh ccungccaw a hinnnaw nynh tuihaw lan hawzah, a phute huaccepaw nynh thua.


Ccungccaw miakaw nynh ny lang a ccanpaw a ny kho leipaw ccang kheit a um. A thuanaw tahkyhte a phya khonaw kya, “ Kae oun bawm langpaw zungzae um a ho cite a thinlung kya a um hawte Kamaw nynh mah ka bawm kho langpaw  zungzae  um a ho,” cite a tuaku  zungzae  a ho. Tuh-e tuh nynh hythuanaw a peki haepaw hanlan tuh Paaw Pachia lung atung haepaw tuh thua. (Mutualization) thinlung ahoi kho haepaw nynh thua.


A ccaccingte ho lanze, ccungccaw a peki  lei haepaw minphuin te khua ram hanlan phuakhoi zemah a lakaw lang vuapaw cia te a tuaku haepaw ccungccaw nynh tuh, a ryalawnaw konglang lungria thae te a vaw asaw zungzae cih. Amaw hanlan bawmtu, hokhaetu, pakhaetu um kho lang khyh zah thingpha- lungriathae te a um zungzae cih.


Minphuin te khua ram hanlan thuasah, a ping tungpaw tungvaw thawcci sungsahnaw te bawm rynaw a hoipaw ccungccaw tuh, amaw a pakhaetu, a do-oihtu, a bawmtu lanpaw zungzae a um cih.  A ryalawnaw konglang a sing a pi zungzae cih. Phua-sui zemah mang lanpaw a hoi zungzae cih. Mihae tungvaw thawccinaw te sungsahnaw hoi zah mi a bawm ry  zungzaepaw  tuh ccungccaw hae nynh doliaku rynaw te sungsahnaw kha a tungvaw a hoi hae keiccuze, a thinlung tuh hawnin –khuacci lae leite anaw hiin lahlyhpaw thingku hawte lungpaw-lungtuanaw te a beih zungzae cih.


Ccungccaw pawlang ria leipaw te minphuin te khuaram a peki leipaw nynh tuh, a hoipaw a phua-sui kya lungtuakhae kunaw um kho khyh. Pawccecize mih phua- sui a zo lanze mihmaw kha a bawm lanpaw te a pyabua lanpaw um khyh cite a tuaku zungzae. Mih sii thahpaw te minghae hanlan  a hoi haepaw kha a hy sahpaw a thua khyh keiccuze mihhae kyate mawe lang cipaw mah ngehoiku nga khyh zah, Pachia kya-e hythuanaw cipaw mah a thinlung kya um kho khyh. A thinlung kya thingku anaw analpaw hawte a thin a pha zungzae. Tuhcihawpaw ccungccaw hae tuh Raetu Pachia a ngaehoiku lei haepaw  nynh a hoi haepaw thinlung nynh thua.


Ccungccaw hae bawm te pya cipaw hynh phua-sui te sisua a hoi keiccuze  pyapaw te bawmpaw thua khyh. A singpi leinaw kyate a hoi leipi te khuaram te minphuin sungsahnaw thinlung te mihae hanlan pyapaw te hlupaw nynh thua. Atunin amaw hanlan heize a singpi leinaw kyate betaraw ahoipaw kya-e uno- vaeccaw sungsahnaw thinlung te pya khopaw te hlu khopaw  ( Participation) ccang cite tua kho paw hynh a raw hoypaw te  a raw thawngpaw ccungccaw lukheit nynh htua.


Ming a ban tuh, chi raw ka ri khyh!  ka chi zemah pawtua um khyh cite tuakunaw a hoi haepaw hynh, Laevaw hiinzung ryakunaw kong lang mih lung a thapaw te mih raw a thah ccepaw  ccungccaw nynh thua hae. Ccungccaw chi cipaw  hynh a ru leipaw  zoi  bahheihpaw thua zah, a chi koute mah paw peki lanpaw  um kho vae khyh.


Tukeiccu tuh chi raw a ri haepaw te ccungccaw te peku maeku a hua lei haepaw hynh  laevaw hiinzung ryakunaw kong lang a hiin nga haepaw thua zah  mih raw a thawngcce haepaw pese a pui haepaw nynh thua. Chiaku raw a ri lei haepaw te chi raw a ri lei haepaw hynh pynsaw lante  angaecce haepaw te sarapaw thinlung sang a hoi lei haepaw   thua zah, laevaw hiinzung kya a hiin nga lei haepaw ccungccaw nynh thua hae. A chi nga lei haepaw te a thehku nga lei haepaw chi raw a ri hae paw   hynh-- laevaw hiinnaw kya a hiin nga haepaw thua keiccuze mih raw a thawng haepaw nynh thua.  Tukeiccu lang tuh Zotung ccaawno hae raw thawng oh sih!.



Raesoi  Kalang

Samyng ninnung ne vya lya lan

Ccekyry nung oun siaki vae

Thingccang kawte      kae do lei ki.

Evopaw nung ounkhua kuki

Raesoi ccanlan ka myng siaki

Thinlung ccite              ka na han vae.

Raesoi byakin thinlung pyate

Laanpi paenaw thing te lung kha

Khia lan hae ze            nyh ung hae ve!.

Raesoi lungccang nae hoi taw vae

Khuanin ccanglang sawpaw ka do

Lung ry ccing lei hiinzung laevaw.

Raesoi maesue muihkho vae lei

Raesoi thinlung khuanin lang paw

Sawpawkaw kya            ka khiaku vae.

(Na sungsah nung  ccekyry  roi)

A phuatu ====   Rev. Bawi Uk

 

Copy tua tu Hae Bik

 

ျပဳျပင္သည့္ေန႔ - တနဂၤေႏြ, 05 ဇြန္ 2011 17:26  

မဲန္ဘာ မ်ားသာ မွတ္စု ေရးခြင့္ ရိွသည္။

အထူးစာမ်က္ႏွာမ်ား

မဲန္ဘာ စာမ်က္ႏွာမ်ား

အ၀င္ တံခါး


Click to join Seccae

Seccae Yahoo Group

တိုက္ရိုက္ အီးေမးလ္၊ seccae@yahoogroups.com

မွတ္စု စာေရးသူမ်ား

  • bawi thang
    8
  • jef chinchin
    7
  • admin
    3
  • kyaw oo
    1
  • azaamei
    1

ေမးပါရေစ

ခ်င္း ဆိုသည္မွာ
 

အြန္လိုင္း ရိွ ဧည့္သည္

 ဧည့္သည္မ်ား 13 ေယာက္  အြန္လိုင္း ရိွေနၾကသည္သည္။

လွ်ဳပ္တပ်က္ ဓါတ္ပံုမ်ား

လက္ေရြးစင္ စာမူမ်ား

ေၾကာ္ျငာ လက္ခံသည္

အဆင့္ျမင့္ ၀က္ဘ္ဆိုက္ ဒီဇိုင္း

  • အဆင့္ျမင့္၊
  • စနစ္က်၊
  • လွပ ျပီး
  • ေစ်းႏႈန္းခ်ိဳသာစြာျဖင့္
  • သင္ စိတ္တုိင္းက် တည္ေဆာက္ေပး ႏုိင္ေၾကာင္း....

၀က္ဘ္ဆိုက္မ်ား ပံုစံမ်ား

  1. ဇိုတုန္
  2. ျမန္မာ စတိုး
  3. အဂၤလိပ္၊ ျမန္မာ၊ ဟားခါး၊ ဇိုတုန္ အဘိဓာန္
=> ဆက္သြယ္ရန္

သင္သိရဲ႕လား?

ေအာက္ပါ လင့္ခ္မ်ားကို အသံုးျပဳျပီး ဤ ၀က္ဘ္ဆိုက္ ကို ၾကည့္ႏုိင္သည္။